Fundurin verður kl. 16.00 í skúlanum og er almennur.

Umhvørvisstovan skrivar, at tað eru Skúvoyar kommuna og hagastýrini í Skúvoy, sum hava heitt á Umhvørvisstovuna um at verja oynna við heimild í Náttúruverndarlógini.

Á fundinum verður kunnað um tilgongdina, tá arbeitt verður við at gera eina verndarkunngerð, og hvussu fólk og aðrir áhugapartar kunnu veita upplýsingar, sum eru viðkomandi fyri skipan av verndini.

Skráin er hendan:

kl.

16.00  Vælkomin

16.05  Hví reisa verndarmál?

Umboð fyri stigtakarar

16.15  Verndarøki í Skúvoy

Theresa Jákupsdóttir, náttúrumálsviðgeri, Umhvørvisstovan

16.50  Orðið er frítt

18.00  Liðugt

Drekka verður at fáa.

Sildberin fer av Sandi kl. 15.00, og úr Skúvoy kl. 18.45.

Skúvoyggin hevur serliga náttúru og er frammanundan eitt Ramsar-verndarøki við altjóða týdningi fyri fugl.

Í viðgerðini av eini møguligari náttúruvernd av Skúvoy, verður dentur lagdur á at hava eina tilgongd, har øll sjónarmið verða tikin við í viðgerðini av verndarøkinum. Tí verður skipað fyri almennum fundi.

Áðrenn endalig verndarkunngerð verður orðað, ger Umhvørvisstovan eina verndarætlan við týdningarmestu avleiðingunum, sum økisverndin kann væntast at fáa. Í hesum sambandi vil Umhvørvisstovan fegin hoyra frá øllum, sum hava eina vitan, sum kann hava týdning fyri verndina av Skúvoynni.

Borgarar, stovnar, feløg, virkir og aðrir áhugapartar kunnu senda uppskot og viðmerkingar til Umhvørvisstovuna innan týsdagin 3. desembur 2024. Vinarliga skriva til [email protected] ella til Umhvørvisstovuna, Traðagøta 38, FO-165 Argir, Vernd, og viðmerk j.nr. 24/05287.