– Hervið skal verða boða frá, at Fólkaflokkurin og undirritaði býráðslimur tekur seg úr minnilutasamstarvinum við Tjóðveldi og Framsókn í Tórshavnar Býráð. Hereftir verður Fólkaflokkurin og undirritaði ein sjálvstøðugur partur í býráðnum og komi at taka støðu frá máli til mál.
Tað skrivar Birgir Nielsen, býráðslimur fyri Fólkaflokkin í Havn.
Hann sigur orsøkina til hesa broyting vera, at hann sum býráðslimur higartil hevur stuðlað flest øllum málum hjá sitandi meiriluta, sum somuleiðis í stóran mun hava verið somu mál sum hann og Fólkaflokkurin fóru tkl val uppá og harvið ynsktu at stuðla.
– Hinvegin má eg ásanna, at eg í nógvum málum ikki havi tikið undir við uppskotum frá pørtum av minnilutanum, av tí at eg ikki síggi Fólkaflokkin og borgarligan politikk aftur í nógvum av hesum málum hjá pørtum av minnilutanum.
– Fólkaflokkurin fekk tveir býráðslimir valdar til síðsta býrádsval. Men av tí at hin valdi býráðslimurin fyri Fólkaflokkin (Annika Olsen, red.) valdi at fara upp í Tjóðveldi í býráðnum og ikki vildi siga býráðssessin frá sær til næst valda á fólkaflokslistanum, so hevur Fólkaflokkurin í løtuni bert ein virkandi býráðslim.
– Broytingin kemur í gildið beinanvegin, skrivar Birgir Nielsen.
