Vitlíki eigur at verða arbeitt inn í vanliga skúladagin sum eitt amboð, sum bæði lærarar og næmingar kenna og duga at handfara. Tað heldur Jacob Eli S. Olsen, formaður Føroya Lærarafelags.
Føroya Lærarafelag meldar seg eins og hini lærarafeløgini í Norðurlondum inn á leikvøllin, tá ið talan er um vitlíki í skúlanum. Á stýrisfundi í vetur í NLS, Nordiska Lärarorganisationers Samråd, varð vitlíki umrøtt, umframt tey fyrilit, ið eiga vera í huga hjá teimum, sum starvast í skúlum, tá ið talan er um vitlíki, skrivar Skúlablaðið.
- Vitlíki kann brúkast sum hent amboð hjá lærarum og næmingum eins og onnur amboð; tað eru stórir menningarmøguleikar við vitlíki sum amboði, men tað hevur nógv at siga at gera greitt, hvussu vitlíki kann tæna okkum og ikki einans gera reglur, soleiðis at tað ikki verður misnýtt. Tað er umráðandi, at lærarar verða útbúnir og læra vitlíki at kenna. Spurningurin er eisini, hvussu vitlíki skal síggjast aftur í námsætlanum og próvtøkum. Vit noyðastat seta ferð á hetta arbeiðið, tí vitlíki floymir inn yvir okkum allastaðni frá; tá vit opna eina tekstviðgerð, rokniark og teldupost, so er vitlíkis-knøtturin fremst fyri. Vitlíki eigur at verða arbeitt inn í vanliga skúladagin sum eitt amboð, sum bæði lærarar og næmingar duga at handfara og gagnnýta.
Vitlíki er málsøki undir Fíggjarmálaráðnum. Fyrireikandi arbeiði er til eina heildarætlan um vitlíki í Føroyum; í sambandi við hetta arbeiðið hevur Føroya Lærarafelag lagt síni sjónarmið fram; umboð fyri undirfelagið fyri kt-vørðir vóru eisini við, tá sjónarmiðini vórðu løgd fram.
Altjóða dagur fyri útbúgving er 24. januar á hvørjum ári. Sameindu Tjóðir, sum hava sett dagin at vera, fer í ár at varpa ljós á vitlíki á altjóða degnum, skrivar www.skulabladid.fo.
