– Vit velja Jørgen inn

– honum nýtist ongan bil...

Soleiðis syngja Jørgen Niclasen og vinmenn í einum valsangi, sum Jørgen Niclasen hevur lagt á Facebook.

Tað var tann 10. februar í ár, at Jørgen Niclasen, landsstýrismaður í fíggjarmálum og formaður Fólkafloksins varð tikin fyri rúsdrekkakoyring ein hósmorgun suðuri í Vági við eini promillu upp á 1,26.

Sjálvt um seks dagar vóru farnir, tá in.fo spurdi løgmann um tilburðin, so visti løgmaður einki mikudagin 16. februar beint eftir døgurða, tá in.fo tosaði við hann – og tað visti Christian Andreasen, sum tá var formaður Fólkafloksins á tingi, heldur ikki. Men málið fekk sjálvandi ta avleiðing, at Jørgen Niclasen varð frákoyrdur sum landsstýrismaður.

Síðani kom ein fráboðan frá Jørgen Niclasen á Vágaportalin, har hann bað Føroya fólk um umbering:

– Eg biði alt Føroya fólk um umbering fyri mítt mistak. Eg hevði drukkið um kvøldið, og morgunin eftir fór eg óumhugsað í bilin og koyrdi at keypa morgunbreyð. Varð steðgaður av løgregluni, sum bað meg blása og vísti mær so, at har stóð "positiv".

– Hetta er eitt mistak, eg havi gjørt, og taki eg tí fulla ábyrgd í stundini. Eg havi heitt á løgmann um at loysa meg úr starvi sum landsstýrismaður, segði Jørgen Niclasen á Vágaportalinum seks dagar eftir hendingina.

Lesið eisini: Jørgen Niclasen tikin fyri rúsdrekkakoyring

Nakrar dagar seinni boðaði hann eisini frá, at hann av somu orsøk fór frá sum formaður í Fólkaflokkinum.

Men nú, átta mánaðir seinni, hevur pípan hjá Jørgen Niclasen fingið annað ljóð um rúsdrekkakoyringina í Vági ein hósmorgun í februar, har hann var farin at keypa morgunbreyð við kenning, tí nú skemtar Jørgen Niclasen við, at hann ikki hevur fyri neyðini at koyra niðan á flogvøllin, tá hann verður valdur á fólkating...