Tað er eitt satt undur. Tað sigur Pál Weihe, ráðgevari hjá myndugleikunum í koronu. Í Fyrradagin vórðu 16 nýggir tilburðir staðfestir, men í gjár vóru ikki meiri enn tveir tilburður staðfestir, hóast heili 3.687 kanningar vóru gjørdar.
Sostatt gongur strikumyndin aftur beint niðureftir, men Pál Weihe heldur, at enn er tað alt ov tíðliga at koma til ta niðurstøðu, at vit hava bast smittuni enn einaferð.
Hann heldur, at tað er eitt undur, at talið er so lágt, og hóast tað er ov tíðliga at koma til nakra niðurstøðu, kunnu vit í hvussu so er draga andan lættari, nú talið er nógv minkað. Samstundis vísir hann á, at tað hevur nógv veitsluhald verið um vikuskiftið og endaliga úrslitið av tí fáa vit ikki at vita fyrr enn um nakrar dagar.
Tí eiga vit framvegis at vísa størsta varsemi og at bíða eftir úrslitinum tær næstu dagarnar, leggur hann afturat. Men samstundis fegnast hann um, at tað, við ógvuliga stuttum skotbráði, ber til at útvega manning til at gera heilar 3.687 kanningar, hóast tað er halgidagur, tí tað hevur sín stóra leiklut í at tað stríðið ímóti koronu hevur hepnast so væl.
