Í morgin, fríggjadagin hin 3. februar, eru 20 ár liðin, síðan Kristin Michelsen á fyrsta sinni varð valdur til borgarstjóra í Tvøroyrar kommunu.
Neyvan hevði hann tá givið sær far um, at hann nú 20 ár seinni framvegis skuldi sita í borgarstjórasessinum.
- Hetta er tó veruleikin hjá froðbinginum, sum fór í farloyvi úr borgarliga skrivstovustarvi sínum sum fulltrúi á sýsluskrivstovuni í 2003, tá honum stóð í boði at gerast borgarstjóri.
Á heimasíðuni hjá Tvøroyrar kommunu í dag er ein frásøgn og heilsan til Kristin Michelsen á degnum.
- Kristin hevur bankaútbúgving og starvaðist í gamla Sjóvinnubankanum árini 1973-1978. Eisini er hann útbúgvin timburmaður, eitt yrki hann røkti árini 1978-1984. Árini 1981-2003 starvaðist hann sum eykaløgreglumaður og fulltrúi á sýslu-skrivstovuni í Suðuroynni.
Kristin Michelsen er føddur hin 30. juni 1956. Hann er sonur Vilborg og Mikkjal Michelsen, ið búðu undir Heygnum á Tvøroyri.
- Her vaks hann upp saman við tveimum eldri beiggjum, Niels Jacobi og Daniel Jacobi, tvíburabróðrinum, Poul Juul, yngra beiggjanum Vilmundi og systrini, Sóley.
Á heimasíðuni hjá Tvøroyrar kommunu verður víst á, at abbin í móðurætt er eingin minni enn mæta Hargaskaldið, Pól F, sum mesta av ævini búði á Hamri í Froðba, haðani hann krøkti seg so fastan í føroyska mentanararvin, at hansara orð ongantíð tagna.
Meira um borgarstjóran í Tvøroyrar kommunu seinastu 20 árini kann lesast á www.tvk.fo