USA er á fimta sinni í søguni olympiskur meistari í fótbólti hjá kvinnum.
USA vann í dag 1-0 á Brasil í olympisku finaluni, ið var leikt á Parc de Prince leikvøllinum í París.
Sigursmálið skoraði Mallory Swanson í 57. minutti.
Dómarin legði 10 minuttir aftrat, men Brasil megnaði ikki at svara aftur.
USA vann eisini OL-gull á heimavølli í 1996, og so tríggjar ferðir á rað í 2004, 2008 og í 2012.
Brasil hevur verið í trimum OL-finalum, men hevur tapt allar tríggjar finalurnar móti sama liði, USA.
38 ára gamli stórleikarin hjá Brasil, Marta má nú ásanna, at hon fer ikki at vinna olympiskt gull.
Týskland vann bronsu við 1-0 sigri á Spania. Giulia Gwinn hjá Bayern München skoraði sigursmálið hjá Týsklandi.
Í olympisku kappingini hjá kvinnunum eru tað tey sterkastu liðini sum kappast. Í kappingini hjá monnum eru tað U23-landslið styrkt við trimum eldri leikarum, ið kappast.
