Óli Mittún og liðfelagarnir í Sävehof eru svenskir meistarar í manshondbólti.
Við einum fantastiskum avriki frá serliga Óla Mittún vann Sävehof ein greiðan 32-27 sigur á Ystad á útivølli í tí fjórðu meistaraskapsfinaluni.
Sävehof vann sostatt finaluuppgerðina 3-1.
Tað sá annars út til at blíva enn ein dramatiskur dystur, tí í steðginum var Ystad á odda 13-11.
Men við stórspæli, og tá serliga hjá Óla sum bumbaði bóltarnar í kassan hjá Ystad, umframt at leggja upp til hópin av málum vann Sävehof seinna hálvleik 21-14, og harvið dystin 32-27.
Óli gjørdist toppskjútti við níggju málum, og hann fekk nógv lovorð frá frásøgumanninum og viðmerkjaranum hjá SVT 2.
Og Óli var sjálvsagt valdur at vera besti leikarin hjá Sävehof í fjórðu finaluni.
Í 2021 gjørdist systkinabarnið, Elias Ellefsen á Skipagøtu svenskur meistari við Sävehof.
Hetta er áttanda ferðin í søguni, at mansliðið hjá Sävehof vinnur svenska meistaraheitið.
Talan hevur verið um eitt minniligt kappingarár hjá Sävehof, ið eisini vann seg í fjórðingsfinalurnar móti Flensburg-Handewitt í EHF European League.
Harumframt eru kvinnurnar hjá Sävehof eisini svenskir meistarar 2024, so fyri felagið, Sävehof er talan um eitt fantastiskt kappingarár.
