Seinasta ESSO pumpan, ið stendur eftir í Føroyum, er høvuðsumvæld og sett upp aftur í Trøðum á Sandi, har hon hevur staðið síðan 1955. Pumpan var í ógvuliga ringum standi og mátti nú umvælast, áðrenn hon fór so illa at einki gjørdist við hana. - ESSO setti pumpuna upp í 1955. Eg haldi, at tað var Palli á Lava, ella ESSO-Palli, sum setti hana upp, og pumpan bleiv brúkt nakað inn í 1980ini sigur Tórur Johannesen, ein av stigtakarunum til umvælingina. Tað eru Miðstovumenn heiman av Sandi, sum hava tikið sær av at umvæla pumpuna og serliga er tað Ásmund Johannesen, sum hevur tikið sær arbeiðnum, sigur Tórur. - Pápin (Kristian Johannesen) og Magnus (bróðir Kristian) høvdu eitt virkið, sum byrjaði í 1937. Teir umsótu pumpuna og høvdu oljusølu í oynni eisini, sigur Tórur Johannesen. Pumpan hevur staðið til øll árini síðan hon var uppsett, men nú er hon gjørd óvirkin. Tórur Johannesen sigur, at til hesa pumpuna eru deilir av eini aðrari pumpu brúktir, tí tann gamla var í so ringum standi. - Vit fingu eina pumpu úr Danmark, sum vit kundu brúka til eykalutir til hesa pumpuna. Tí arbeiðnum hevur Dávur Winther í høvuðsheitum tikið sær av, sigur Tórur Johannesen.