Tað hevur ikki verið endaliga greitt, um Henrik Old fór at lata seg stilla uppaftur á løgtingsvalinum hin 26. mars.

Men, í kvøld verður so væntandi seinasti uppstillingarfundur hjá Suðuroyar syðra Javnaðarfelag, har Henrik Old hevur verið uppstillaður heilt síðan á løgtingsvalinum í 1984 - við undantakið av løgtingsvalinum í 2008, tá hann ikki stillaði uppaftur.

Undan uppstillingarfundinum í kvøld tykist greitt, at Henrik Old hevur stillað upp til eitt løgtingsval fyri seinastu ferð, og at uppgávan hjá felagnum nú verður at finna eitt nýtt valevni fyri flokkin í syðru helvt av Suðuroynni.

In.fo veit frá vælvitandi keldum í dag at siga, at áhugin í Suðuroy at stilla upp fyri Javnaðarflokkin í skortar ikki, men uppgávan verður at finna eitt valevni, sum kann lyfta uppgávuna eftir løgtingsmannin gjøgnum mong ár, Henrik Old.

Henrik Old kom fyrstu ferð á ting eftir løgtingsvalið í 1984 og hevur sitið meginpartin av tíðini síðan. Í 2004 varð hann ikki afturvaldur, men tá Jóannes Eidesgaard gjørdist løgmaður, kom hann inn sum varamaður.

Á løgtingsvalinum í 2008 stillaði Henrik Old ikki upp, men í 2011 stillaði hann upp aftur og varð valdur, og hann hevur sitið á Føroya løgtingi síðan.

Í stívliga trý ár - frá 5. september í 2015 til hin 1. oktober í 2018 - sat Henrik Old sum landsstýrismaður í samferðslumálum.