Fríggjadagin 29. september frá klokkan 12 til 15 verður almenn fráfaringarløta á tilbúgvingarstøðini í Eysturkommunu.

Tilbúgvingarstøðin er í Sjóvartúni 11 í Leirvík, og hetta er á gomlu ferjuleguni.

Løtan verður hildin fyri Sørini S. Djurhuus, sum hevur verið í starvi innan tilbúgvingina hjá Eysturkommunu - og gomlu Gøtu kommunu - í samfull 43 ár.

16 av hesum árunum hevur hann verið leiðari. Nú Sørin verður 67 ár, takkar hann fyri seg.

- Tí vilja vit fegin takka Sørini fyri tíðina og hansara lut í tilbúgvingini, samstundis sum vit bjóða til almenna fráfaringarløtu, har øll eru vælkomin.

Tað sigur Per Martin Gregersen, formaður í tilbúgvingarnevndini og borgarstjóri í Eysturkommunu í dag.

Eysturkommuna hevur sett 55 ára gamla, Gunnar Olsen, sum nýggjan tilbúgvingarleiðara hjá kommununi. Hann byrjar í starvinum hin 1. november í ár.