Turkaland bleiv mett sum eitt av londunum, ið tú skuldi hava eyguni eftir til EM 2020, men longu í setanardystinum gekk galið. Turkaland tapti allar tríggjar dystirnar og tú kundi sagt, at niðurtúrurin helt fram til septembur 2022, tá teir taptu 2-1 móti Føroyum á Tórsvølli.

Tað passer so ikki heilt, tí Turkaland vann Nations League bólkin. Teir vunnu eisini undankappingarbólkin til hetta EM-endaspælið framman fyri Kroatia. Turkaland er í bólki F saman við Portugal, Georgia og Kekkia.

Spurningurin er nú, um Turkaland hevur lært av seinasta EM-endaspælinum. Vónirnar eru ikki eins stórar hesa ferð, men tað finnast dygdargóðir spælarar á liðnum. Stjørnan er Hakan Çalhanoğlu, sum spælir við italska Inter. 30 ára gamli miðvallarin er ein støðug hóttan við sínum framúr skoti. Hann kann bæði skjóta beinleiðis fríspark og fær hann ein møuleika í opnum spæli, so meddar hann til.

Síðani er tað miðverjin Çağlar Söyüncü, sum er útleigaður til turkiskan fótbólt frá Atlético Madrid og nýggja stjørnuskotið Arda Güler, sum spælir við Real Madrid.

Flestu av spælarunum spæla á rímiliga høgum stigi. Um Turkaland hevur lært av seinasta EM-endaspælinum, so er ongin vandi fyri, at liðið tapir allar tríggjar dystirnar.

Venjari er fyrrverandi italski áleyparin Vincenzo Montella. Hann tók við í septembur 2023. Hann er ikki ókendur í turkiskum fótbólti, tí hann hevur verið venjari hjá Adana Demirspor. Tað verður hann, sum skal tryggja, at avrikini hjá Turkalandi avspegla styrkina í hópinum til EM-endaspælið. Mest sannlíkt fær Turkaland trý stig móti Georgia, so er spurningurin um tað verður til meira.

Føroyar hava tvær ferðir fingið stig móti Turkalandi. Í 1991 spældu vit javnleik á Ovaravølli í Gundadali. Todi Jónsson skoraði málið. Og í 2022 vunnu Føroyar 2-1 í Nations League dystinum á Tórsvølli. Bæði B36 og Víkingur hava roynt seg móti turkiskari mótstøðu í Evropa. B36 móti Fenerbahçe, Besiktas og Ankaragücü, og Víkingur móti Besiktas.

Hópurin:

Málverjar:

Altay Bayindir (Manchester United)

Mert Günok (Besiktas)

Ugurcan Cakir (Trabzonspor)

Verjuspælarar:

Mert Müldür (Fenerbahce)

Ferdi Kadioglu (Fenerbahce)

Zeki Celik (Roma)

Abdülkerim Bardakci (Galatasaray)

Ahmetcan Kaplan (Ajax)

Merih Demiral (Al-Ahli)

Samet Akaydin (Panathinaikos)

​Miðvallarar:

Hakan Calhanoglu (Inter)

İsmail Yuksek (Fenerbahce)

Kaan Ayhan (Galatasaray)

Okay Yokuslu (West Bromwich)

Orkun Kokcu (Benfica)

Salih Ozcan (Dortmund)

Álop:

Irfan Can Kahveci (Fenerbahce)

Yunus Akgün (Leicester)

Kenan Yildiz (Juventus)

Kerem Akturkoglu (Galatasaray)

Barıs Alper Yilmaz (Galatasaray)

Arda Guler (Real Madrid)

Cenk Tosun (Besiktas)

Semih Kılıcsoy (Besiktas)

Yusuf Yazici (Lille)

Bertug Yildrim (Rennes)

Venjari: Vincenzo Montella (Italia)