Mikkjal hevur í fleiri ár víst sínar dygdir á venjaraøkinum. Fyrst í B36 og síðani fleiri ár í KÍ, har hann saman við lokalum kreftum, bygdi felagið upp til at standa seg, fyrst í oddinum í føroysku kappingini og síðani at bjóða av í evropa.
Eitt er at byggja upp, eitt annað er at halda støðið og at byggja víðari, hetta er ein av mongu eginleikunum hjá Mikkjali. Mikkjal er sera nærlagdur, við tí hann ger og setir sær fyri.
Áhaldandi góða venjaraarbeiði og tað at KÍ byrjaði at bjóða evropa av, hevur helst havt sína orsøk til, at Fredrikstad ynskti at fáa føroyska venjaran til felagið í 2023.
Eftir uppflyting til bestu deildina, nevnd eliteserien, fyrsta árið og síðani eitt avbera flott fimta pláss higartil í 2024, hevur vakt ans kring norðurlond og helst aðrastaðni við.
AIK Stokholm ynskti føroyska venjaran og hevur skrivað sáttmála við Mikkjal, og loyst hann úr starvinum hjá Fredrikstad í úrtíð.
Tað sum gleðir Venjarafelag Føroya er, at føroyskur venjarin kann koma upp á tindarnar í útlandinum.
Sjálvandi kemur einki av sær sjálvum, tað krevur hart arbeiði og nógvar tímar á vøllinum, framman fyri skíggjanum, samrøður, fyrireikingar og góða leiðslustýring.
Og hetta eigur at geva áræði og íblástur, til aðrar føroyskar venjarar, sum ætla ella kundu hugsa sær, eina yrkisleið sum venjari uttanlands.
Venjarafelag Føroya ynskir Mikkjali hjartaliga til lukku við sáttmálanum við AIK Stokholm og hansara frálíku yrkisleið sum venjari higartil, til stóran íblástur fyri føroyskar venjarar og føroyskan fótbólt.
Heilsan
Venjarafelag Føroya
