Øll 21 tingfólkini, sum atkvøddu, tóku undir við uppskotinum. Eingin atkvøddi ímóti, og eingin atkvøddi blankt.

Uppskotið, sum Beinir Johannesen, løgmaður, hevur lagt fram, broytir ræðislógina, so málsøkið rúsandi evni verður yvirtikið. Málið hevur verið til viðgerðar í Uttanlandsnevndini. Tingmálið sæst her.

Við yvirtøkuni fáa føroyskir myndugleikar lóggávuvald og útinnandi vald á økinum. Málsøkið er í dag felagsmál, hóast føroyskir myndugleikar longu umsita tað og bera meginpartin av útreiðslunum.

Ein av grundgevingunum fyri yvirtøkuni er, at tað skal ganga skjótari at dagføra reglurnar um rúsevni.

Í viðmerkingunum til uppskotið verður víst á, at Heilsu- og orkumálaráðið hevur royndir við, at tað tekur sera langa tíð at fáa nýggj rúsevni á listan yvir evni, sum einans kunnu nýtast til medisinsk og vísindalig endamál.

Við føroyskum lóggávuvaldi verður mett, at henda tilgongdin verður bæði lættari og skjótari. Samstundis verður betri møguleiki at laga reglurnar til føroysk viðurskifti.

Útreiðslurnar av yvirtøkuni verða væntandi avmarkaðar, tí flestu uppgávurnar longu liggja hjá føroyskum myndugleikum.

Gildiskoman er sett til 1. januar 2027, so myndugleikarnir fáa stundir at fyrireika yvirtøkuna og gera neyðugar samstarvsavtalur við danskar myndugleikar. Hetta stendur í viðmerkingunum til lógaruppskotið.

Málið skal nú til triðju viðgerð, áðrenn tað er endaliga samtykt.