Hóast blokkurin hjá Benjamin Netanyahu er størstur eftir valið í Ísrael, er enn eingin greiður vinnari.

Við góðum 66 prosentum av atkvøðunum taldum stendur blokkurin hjá Netanyahu til 56 av teimum 120 sessunum í Knesset. Andstøðuflokkarnir, uttan teir arabisku flokkarnar, standa til 48 sessir, meðan tveir arabiskt leiddir flokkar standa tilsamans til 16.

Tað krevur 61 sessir at hava meiriluta.

Netanyahu manglar sostatt fimm sessir, men hevur avvíst at samstarva við arabisku flokkarnar. Tað merkir, at hann annaðhvørt má fáa stuðul úr andstøðuni ella vóna, at endaliga uppteljingin flytur fleiri sessir til hansara blokk.

Andstøðan hevur ein annan møguleika. Fær hon stuðul frá teimum 16 arabisku tinglimunum, kann hon í tølum savna ein meiriluta upp á 64 sessir.

Yair Golan, leiðari í vinstravenda flokkinum Demokratunum, heitir nú á restina av andstøðuni um at samstarva við arabisku flokkarnar.

– Vit kunnu ikki longur góðtaka rasistisku sundurbýtingina hjá Netanyahu millum jødiskar og arabiskar atkvøður, skrivar hann sambært AFP á sosiala miðlinum X.

– Vit hava eina ábyrgd og ein møguleika at skipa eina stjórn fyri broyting í samstarvi við arabisku borgararnar í Ísrael.

Men eitt slíkt samstarv kann gerast trupult. Fleiri flokkar í andstøðuni hava verið ivasamir um at gera seg bundnar av arabiskum flokkum.

Tá endaliga valúrslitið fyriliggur, fer ísraelski forsetin, Isaac Herzog, at hava samráðingar við flokkarnar. Síðan velur hann tann politikaran, sum hann metir hava bestu møguleikan at skipa stjórn. Tað nýtist ikki at vera leiðarin í størsta flokkinum.

Eydnast ongum at savna 61 tinglimir, kann Ísrael fáa eina minnilutastjórn – ella enn eitt nýval.

Stjórnarsamráðingarnar kunnu taka drúgva tíð. Eftir valið í 2022 brúkti Netanyahu 58 dagar til at skipa stjórn. Meðan samráðingarnar fara fram, heldur hann fram sum virkandi forsætisráðharri.