Danska forsætisráðfrúan, Mette Frederiksen, hevur uppiborið at missa Grønland.
Tað skrivar Kirill Dmitriev, sum er ráðgevi hjá russiska forsetanum, Vladimir Putin, í búskaparligum og altjóða málum, í einari dagføring á sosiala miðlinum X týskvøldið.
Við dagføringini er eitt sjónband, har Mette Frederiksen finst at tí, at finski forsetin og norski forsætisráðharrin hava tosað í telefon við Putin.
– Hon hevur uppiborið at missa Grønland. Krígsskapararnir fara at tapa. Samrøðan fer at vinna, skrivar Dmitriev.
Hann hevur verið russiskt sendifólk í samráðingunum um eina loysn á krígnum í Ukraina.
Finski forsetin, Alexander Stubb, boðaði týsdagin frá, at hann saman við norska forsætisráðharranum, Jonas Gahr Støre, hevði tosað í telefon við Putin.
Samrøðan fekk blandaða móttøku millum sameindu londini.
Mette Frederiksen var millum tey, sum funnust at stignum.
– Eg eri sera ivasom um hetta egna norska og finska stigið. Tað er ikki samskipað við okkum onnur, segði hon við danska TV 2 í sambandi við fundin hjá Norðurlandaráðnum í Finnlandi.
– Eg haldi, at vit eiga at halda Evropa saman heldur enn at fara hvør sína leið.
Svenski forsætisráðharrin, Ulf Kristersson, hevur eisini víst á, at slíkar samrøður kunnu vera vandamiklar, um tær syndra felags evropeisku røddina.
Norski forsætisráðharrin vísir aftur atfinningunum.
– Vit tosa ikki vegna onnur enn okkum sjálv, men stigið er væl og virðiliga umrøtt. Allir okkara samstarvsfelagar og sameindu vóru kunnaðir frammanundan og hava eisini fingið eina gjølliga frágreiðing aftaná, segði Jonas Gahr Støre við norska miðilin VG.
Meðan norðurlondini eru ósamd um samrøðuna, tekur ukrainski forsetin, Volodymyr Zelenskyj, øðrvísi undir við henni.
Í einari dagføring á X skrivar hann, at hann er takksamur fyri tað virkna diplomatiska arbeiðið hjá Noregi og Finnlandi.
Ritzau
