Bárður á Lakjuni er ein sermerkt rødd á føroyska tónleikapallinum. Við sínum heita og inniliga framførsluhátti skapar hann eina nærveru, sum røkkur beint inn til hjartað

- Á hesari stovukonsertini sleppa áhoyrarar at uppliva sangir í hugnaligum og intimum kørmum, har tónleikurin fær rúm at anda og liva.

Soleiðis verður sagt á heimasíðuni hjá Sjóvar kommunu í dag.

- Hetta verður ein løta við nærleika, reflektión og vøkrum tónum, framførd av einum listamanni, sum megnar at sameina dýpd, trúvirði og musikalskan førleika á serstakan hátt.

Víst verður á, at eftir framførðsluna fer Birgir Kruse at hava eina samrøðu við Bárð.

- Prátið verður tikið uppá á video og lagt út á ymiskar SoMe-platformar, eitt nú Facebook og Youtube. Framførðslan verður ikki tikin upp.

Sagt verður, at tiltakið verður í hølunum hjá Strandamáling - í hølunum, sum áður vóru kafé, men sum nú er gjørt til eitt mentanarstað.

- Formatið skapar eitt fjálgt og persónligt rúm, har sangarin og listafólkið eisini framførir í tættari nærveru við náttúrina, verður lagt aftrat.