Eitt vinstravent og tvey tjóðskaparlig valevni eru á odda í valinum til tríbýtta forsetaráðið í Bosnia-Hersegovina, eftir at valstøðini lótu aftur í dag.
Tað vísa fyribils úrslit sambært tíðindastovuni Reuters.
Tey trý valevnini eru Denis Becirovic úr vinstravenda sosialdemokratiska flokkinum SDP-BiH, Zeljka Cvijanovic úr serbiska tjóðskaparliga flokkinum SNSD og Darijana Filipovic úr kroatiska tjóðskaparliga flokkinum HDZ-BiH.
Á valinum skulu veljararnir velja eitt stórt tal av politikarum á fleiri ymiskum stjórnarstigum.
Hetta er partur av eini fløktari politiskari skipan, sum hevur hildið saman upp á sundurbýtta landið, síðan friðaravtalan í 1995 gjørdi enda á einum kríggi, sum hevði vart í meira enn trý ár.
Týdningarmesta valið í dag er til forsetaráðið. Tað hevur tríggjar limir, sum umboða teir tríggjar størstu fólkabólkarnar í landinum: bosniskar serbar, kroatar og bosniakkar.
Eftir friðaravtaluni er Bosnia-Hersegovina býtt í tvær fyrisitingarligar eindir. Tær eru Republika Srpska, sum er serbiski parturin, og samveldið hjá bosniakkum og kroatum, sum er bosniakkisk-kroatiski parturin.
Valstøðini lótu aftur umleið klokkan 19 lokala tíð. Sambært tíðindastovuni AFP varð atkvøðugreiðslan tó longd á summum valstøðum vegna tøkniligar trupulleikar.
Valstríðið hevur verið merkt av sera ymiskum hugsjónum um framtíðina hjá sundurbýtta landinum.
Summi vilja hava eitt savnað land, meðan onnur ynskja størri serbiskt sjálvræði. Kroatar vilja hava størri politiska umboðan.
Sambært AFP eru fleiri veljarar troyttir av, at stóru flokkarnir framvegis leggja dent á orðaskiftið og ósemjurnar frá krígsárunum.
Fleiri høvdu heldur vónað, at valevnini fóru at leggja dent á búskaparligu avbjóðingarnar í einum av fátækastu londunum í Evropa.
/Ritzau/
