Jóhan á Plógv Hansen og liðfelagarnir í Skanderborg-Aarhus hava tapt tríggjar av teimum seinastu fýra dystunum í bestu donsku hondbóltsdeildini.

Og tað byrjar at síggjast á stigatalvuni. Skanderborg-Aarhus er nummar sjey í deildini við 10 stigum. Teir hava sjey stig upp til oddaliðið, GOG, ið er liðið hjá Óla Mittún.

Í kvøld tapti Skanderborg-Aarhus á heimavølli 29-31 fyri Fredericia, ið var á odda 16-15 í steðginum.

Jóhan skoraði sjey mál upp á níggju málroyndir, og var næstbesti málskjúttin hjá heimaliðnum.

Í næstbestu deildini hava Rúnar Hammer og liðfelagarnir í Stoholm enn fyrsta stigið til góðar aftaná sjey dystir.

Hesaferð tapti Stoholm á útivølli 21-34 (8-16) fyri Team Sydhavsøerne. Rúnar skoraði fýra mál.

Liðið hjá Juliani J. Kragesteen, Køge tapti á útivølli 30-32 (17-18) fyri Rækker Mølle.

Køge er fjórðaftast í deildini við fýra stigum.