Tað er ikki ásett, at gýtingarfríðingin á Føroyabanka altíð skal byrja og enda somu dagar.

Tað staðfestir Bárður á Steig Nielsen, landsstýrismaður í fiskivinnumálum, í svari til ein § 52a-fyrispurning frá Sámali Peturi í Grund, løgtingsmanni fyri Sjálvstýri.

Sámal Petur í Grund hevur spurt, hví Føroyabanki verður stongdur fyri allari veiðu frá 1. januar til 15. mai, tá gýtingin hjá toskinum vanliga ikki byrjar fyrr enn seinni á árinum.

Hann hevur eisini spurt, um fríðingin kann hava avleiðingar fyri aðrar fiskivinnur, og um ætlanir eru um at broyta skipanina.

Fríðingin kann byrja í februar

Í svarinum vísir landsstýrismaðurin á, at sambært galdandi kunngerð um tíðaravmarkað veiðibann á gýtingarleiðum er Føroyabanki friðaður fyri øllum veiðihættum frá 15. februar til 15. mai.

Áðrenn 2024 var gýtingarfríðingin frá 1. mars til 1. mai. Eftir tilmæli frá Havstovuni varð tíðarskeiðið longt í 2024, so fríðingin tá var frá 15. februar til 15. mai.

Landsstýrismaðurin sigur, at gýtingarfriðingin hjá toski á Føroyabanka kann vera ymisk millum árini, men at mesta gýtingin er frá hálvum mars til hálvan apríl.

Kanningar vísa eisini, at gýtingin seinastu árini hevur verið nakað seinni enn undanfarin ár.

Skal verja toskastovnin

Endamálið við gýtingarfríðingini er at verja toskastovnin á Føroyabanka, so hann fær frið at ferðast til og frá gýtingarøkinum og fær frið í sjálvari gýtingini.

Bárður á Steig Nielsen sigur, at ongar ætlanir eru um at broyta gýtingarfríðingina í løtuni.

Hann leggur tó dent á, at tað hevur týdning at fylgja væl við gongdini og í samráð við Havstovuna laga tíðarskeiðið fyri fríðingini, so tað samsvarar við gýtingina hjá toskinum.