Uppskotið hjá Miðflokkinum um at broyta fosturtøkulógina er fallið á tingi.

Við atkvøðunum 18 móti 13 feldi Løgtingið fyri løtu síðani uppskotið, sum millum annað skuldi seta krav um ráðgeving og umhugsanartíð, áðrenn ein kvinna tekur endaliga avgerð um fosturtøku.

Sum vit áður hava skrivað, skuldi kvinnan eisini fáa í boði eina ultraljóðskanning í hesum tíðarskeiðinum.

Steffan Klein Poulsen, løgtingsmaður fyri Miðflokkin, legði uppskotið fram. Tað var til fyrstu viðgerð 24. september og varð síðani beint í rættarnevndina.

Nevndin fekk longda freist til 4. november at lata álit, men einki álit kom innan freistina.

Hervør Pálsdóttir, sum sjálv er limur í rættarnevndini, bað tí um at fáa málið aftur í tingsalin, so tingviðgerðin kundi halda fram, hóast einki álit var latið.

Løgtingið hevur viðgjørt málið síðani klokkan 13, og beint fyri klokkan 16 fall tað endaliga við 2. viðgerð í Løgtinginum.