So bragdaði hjá Leivi Mortensen, Tróndi Mikkelsen og liðfeløgunum í HF Karlskrona í bestu svensku hondbóltsdeildini.
Aftaná tap í tveimum teimum fyrstu dystunum eydnaðist Karlskrona í kvøld á heimavølli móti AMO at vinna ein tepran 31-30 sigur. Í seinasta álopinum vann Leivur heimaliðnum eitt brotskast. Emil Hansson var tryggur við brotskastinum, og so kundi heimafjøldin stórfegnast um fyrsta sigurin hetta kappingarárið.
Í steðginum var AMO á odda 17-14.
Tróndur skoraði fýra mál upp á seks málroyndir, og hann legði eisini upp til fimm mál. Leivur skoraði fýra mál upp á fýra málroyndir, og hann vann liðnum eitt sera týðandi brotskast heilt móti dystarenda.
Komandi fríggjakvøld hevur Karlskrona dyst á útivølli móti Malmö.
