Seinnapartin í dag tóku Vilhelm Poulsen og liðfelagarnir í Lemvig-Thyborøn móti allari stjørnuparaduni hjá Aalborg í heimadysti í bestu donsku hondbóltsdeildini.

Undan dagsins dysti høvdu Niklas Landin, Mikkel Hansen og liðfelagarnir í Aalborg fult stigatal, 26 stig fyri 13 dystir, meðan Lemvig-Thyborøn bert hevði seks stig.

Aalborg var risastórur favorittur hjá veddingarfyritøkunum at vinna á Lemvig-Thyborøn.

Men Vilhelm og liðfelagarnir megnaðu í dag eitt satt bragd við javnleiki 30-30 móti suverena oddaliðnum.

Lukkutíð bjargaði málverjin hjá Lemvig-Thyborøn, Emil Tellerup einum skoti frá Mads Hoxer tá seks sekund vóru eftir av dystinum, og so kundu teir hjá Lemvig-Thyborøn stórfegnast um javnleikin móti Aalborg.

Vilhelm skoraði fýra mál og legði upp til tvey mál.

Lemvig-Thyborøn er næstaftast í deildini, men nú við sjey stigum. Aalborg er við 27 stigum seks stig frammanfyri nummar tvey, Fredericia sum hevur 21 stig.

Komandi hóskvøld skulu Vilhelm og liðfelagarnir spæla dyst á útivølli móti júst Fredericia. Spennandi verður um teir hjá Lemvig-Thyborøn megna at fremja enn eitt bragd.