Føroyar høvdu nærum 2,8 milliardir krónur í avlopi á rakstrarviðskiftum gjaldsjavnans í 2025. Tað eru góðar 700 milliónir krónur meira enn í 2024, vísir nýggj uppgerð frá Hagstovu Føroya.

Inntøkurnar frá vøru- og tænastusølu, fíggjarognum uttanlands og flytingum úr útlondum vóru knappar 20 milliardir krónur. Útreiðslurnar vóru góðar 17 milliardir.

Serliga vøruútflutningurin dró avlopið upp. Sølan av vørum uttanlands vaks úr 11,6 milliardum krónum í 2024 upp í 13,3 milliardir í 2025. Tað er ein vøkstur á 1,7 milliardir krónur.

Hall á tænastuhandlinum

Vørujavnin hevði eitt avlop á góðar tvær milliardir krónur. Hinvegin var hallið á tænastujavnanum knappar 700 milliónir krónur.

Lønarflytingar góvu eitt íkast til avlopið á 625 milliónir krónur, fíggjarinntøkur 250 milliónir og rakstrarflytingar 561 milliónir.

Rakstrarflytingar fevna millum annað um flytingar frá danska statinum og pensións- og tryggingarflytingar.

Sambært Hagstovuni hava stór avlop verið á rakstrarviðskiftum gjaldsjavnans síðani 2013.

Hagstovan ger vart við, at ein ávís óvissa er um tølini fyri tænastuhandilin, tí tey byggja á spurnabløð til ávísar fyritøkur.

Kelda: Hagstova Føroya.