info
Ongi úrslit
© Mads Claus Rasmussen/Ritzau Scanpix
Grønlendski landsstýrisformaðurin, Jens-Frederik Nielsen, hevur veruliga fingið seg royndan í altjóða politikki. Her sæst hann í práti við pólska forsætisráðharran, Donald Tusk.

Samgongan í Grønlandi tódnað úr fýra flokkum í tveir

Eftir eina viku við politiskum órógvi hevur Grønland fingið nýtt landsstýri. Bert tveir av teimum upprunaligu fýra samgonguflokkunum eru nú eftir, men nýggja landsstýrið varð kortini góðkent uttan eina einastu atkvøðu ímóti.

Eirikur Lindenskov
17. november 2026 kl. 09:36

Grønlendska landstingið, Inatsisartut, góðkendi í gjár nýggja landsstýrið hjá Jens-Frederik Nielsen.

Tilsamans 20 tinglimir atkvøddu fyri, eingin ímóti, meðan átta tinglimir atkvøddu blankt.

Nýggja landsstýrið er mannað við umboðum úr Demokraatit og Inuit Ataqatigiit. Upprunaliga vóru eisini Siumut og Atassut við í samgonguni, men nú eru bert tveir flokkar eftir.

Broytingarnar koma eftir eina viku við politiskari kreppu í Grønlandi.

Tvey nýggj landsstýrisfólk

Stine Egede úr Inuit Ataqatigiit og Jens-Erik Kirkegaard úr Demokraatit eru nýggj í landsstýrinum.

Stine Egede fær ábyrgdina av almanna-, arbeiðsmarknaðar-, familju- og innanríkismálum. Hon hevur áður verið borgarstjóri í Kommune Kujalleq.

Jens-Erik Kirkegaard verður landsstýrismaður í umhvørvis-, náttúru-, orku- og granskingarmálum. Hann hevur áður verið landsstýrismaður fyri Siumut, men umboðar nú Demokraatit.

Samstundis verður ein umskipan gjørd í landsstýrinum.

Jørgen Rosbach, sum higartil hevur umsitið umhvørvis- og orkumál, tekur við útbúgvingar-, mentanar-, ítróttar- og kirkjumálum.

Hann tekur sostatt við málsøkinum hjá Nivi Olsen, sum legði frá sær í síðstu viku.

Kreppan byrjaði við Atassut

Politisku broytingarnar byrjaðu, tá Atassut mánadagin 9. november boðaði frá, at flokkurin fór úr samgonguni.

Orsøkin var ósemja um Nivi Olsen, sum Atassut kravdi skuldi leggja frá sær.

Tá Atassut fór úr samgonguni, fór Maritha Broberg samstundis úr landsstýrinum.

Dagin eftir boðaði Nivi Olsen sjálv frá, at hon legði frá sær sum landsstýriskvinna.

Tað hevði við sær, at Jens-Frederik Nielsen mátti finna nýggj landsstýrisfólk og skipa landsstýrið av nýggjum.

Andstøðuflokkar stuðla nýggja landsstýrinum

Hóast Atassut er farin úr samgonguni, hevur flokkurin ongar ætlanir um at fella nýggja landsstýrið.

Tað segði formaðurin í Atassut, Aqqalu C. Jerimiassen, undir viðgerðini í Inatsisartut mánadagin.

Eisini Siumut boðaði frá, at flokkurin fór at atkvøða fyri nýggja landsstýrinum, hóast hann ikki longur er partur av samgonguni.

Andstøðuflokkurin Naleraq valdi hinvegin at atkvøða blankt.

Sostatt fekk nýggja landsstýrið undirtøku frá 20 tinglimum og varð góðkent uttan mótatkvøður.

Jens-Frederik Nielsen kann nú halda fram sum landsstýrisformaður við einari samgongu, sum er munandi smalari enn tann, hann upprunaliga skipaði.

Nýggja samgongan hevur kortini undirtøku frá 18 av 31 tinngfólkum. Demokraatit hevur 11 tinglimir. Flokkurin fekk 10 á landstingsvalinum seinast, men síðani tá er Vivian Motzfeldt, sum var landsstýriskvinna í uttaríkismálum fyri Siumut, farin upp í Demokraatit. Hon var misnøgd við, at Siumut tók seg úr samgonguni.

 

Mest lisið hesa vikuna

Nú kanst tú síggja lønina hjá grannanum ella stjóranum

13. november kl. 22:59

Herurin heitir á íbúgvar í Lettlandi um at søkja sær skjól

10. november kl. 22:37

Løgmaður takkað nei til at hitta Zelenskyj

10. november kl. 13:35

Nøkur orð um skyldmannin Allan Enghamar

Í gjár kl. 17:35

Sosialurin hevur nú sítt egna »Tíðarrit«

Í gjár kl. 17:38

Nýggj nevnd í Læknafelag Føroya

11. november kl. 13:05

Fleiri tíðindi

Tíðindi

Landsbankin skal greiða frá penga­streymi úr Føroyum

1 tími síðan
Tíðindi

Nýggj lóg skal tryggja føroyingum rætt til endurvenjing

1 tími síðan
Tíðindi

Ukraina hevur aftur lopið á Kertsj-brúnna

2 tímar síðan
Tíðindi

Maður datt góðar tríggjar metrar av stilladsi í Klaksvík

2 tímar síðan
Fótbóltur

Nations League: Týskland vann stórsigur á Niðurlondum

11 tímar síðan
Tíðindi

Føroyskt ræði á løgregluni til aðru viðgerð

11 tímar síðan
Tíðindi

- Vit gjørdu ov lítið fyri at hjálpa og stuðla Ukraina

12 tímar síðan
Bilar

Tesla fer at byggja sjálv­koyr­andi bil­ar í Týsk­landi

12 tímar síðan
Fótbóltur

Thomas Frank tek­ur við botn­lið­num í Premier League

13 tímar síðan
Tíðindi

Nýggjar samrøður millum Ukraina, USA og ES

14 tímar síðan
Tíðindi

Altjóða da­gur móti harð­skapi móti kvinn­um

14 tímar síðan
Tíðindi

38 lond eru ótrygg um kjarnorkutrygd í Ukraina

15 tímar síðan