Serliga hava broytingarnar í Fólkaflokkinum verið sjónligar í Havn, har øll nevndin í Havnar Framburðsfelag og nevndarlimir í ungmannafelagnum løgdu frá sær. Annika Olsen er farin úr flokkinum, Christian Andreasen hevur lagt frá sær sum floksformaður og stillar ikki uppaftur til løgtingsvalið, og nógvir av gomlu stuðlunum eru burtur. Eisini hava løntu skrivararnir hjá Fólkaflokkinum í Løgtinginum, Johnny í Grótinum og Regin W. Dalsgaard, sum báðir búgva í Havn, lagt frá sær.
Mona Breckmann Wescott, sum er eitt av fýra valevnum hjá Fólkaflokkinum í Havn, hevur verið skrivari, men er í farloyvi. Fyri hana vóru Regin W. Dalsgaard og Johnny í Grótinum skrivarar – og tað stóð á heimasíðuni hjá Løgtinginum so seint sum í síðstu viku, men nú stendur bara, at Mona Breckmann Wescott er í farloyvi, og eingin annar skrivari nevndur.
Regin W. Dalsgaard váttar, at orsøkin til, at hann ikki longur er skrivari hjá Fólkaflokkinum í Løgtinginum er, at hann legði øll álitisstørvini frá sær og nú bara er við á síðulinjuni, sum hann málber seg.
Tað er Løgtingið, sum rindar floksskrivarunum løn, og flokkarnir á tingi fáa játtan til hetta arbeiði eftir stødd á flokkum sambært reglugerð hesum viðvíkjandi.
##med2##
Sambært heimsíðu Løgtingsins eru hesi nú floksskrivarar hjá politisku flokkunum á tingi:
Fólkaflokkurin:
Mona Breckmann Wescott (A) (farloyvi)
Sambandsflokkurin:
Linnéa L. Petersen (B)
Annfinn Brekkstein (B)
Javnaðarflokkurin:
Barbara Gaardlykke Apol (farloyvi)
Herborg H. Gaardlykke (avloysari)
Sjálvstýri:
Lasse Klein
Tjóðveldi:
Eirikur í Jákupsstovu
Rókur Herup Olsen
Framsókn:
Poul Clementsen
Miðflokkurin:
Ólavur í Geil Andresen
Pætur Egholm Jacobsen
