Fyrsta bríksl á LFF stadion í Vilnius verður klokkan 19.45 í kvøld – føroyska tíð. Litava er tveir tímar frammanfyri føroyska tíð. Tað vil siga, at dysturin í Vilnius verður liðugur, tá ið klokkan verður nakrar minuttir í midnátt í Litava.
Nations League dysturin verður spældur á graslíki. Føroyska liðið vandi á vøllinum seinnapartin í gjár. Sagt verður, at talan er um útgávu at graslíki, sum er eldri enn teir vallirnir eru, sum tað nú verður spælt á heima í Føroyum.
Pláss er fyri 5 túsund áskoðarum, og tað verður roknað við, at umleið 4 túsund áskoðarar fara at møta upp í kvøld.
Eftir dystarlok verður gjørt skjótt av á stadion, tí føroyska liðið skal aftur á gistingarhúsið, so spælararnir fáa møguleika at sova í nakrar tímar, áðrenn flogfarið fer á flog við kós ímóti Vágum. Flogfarið er sett at lenda í Vágum í morgin longu klokkan 9.40.
Saman við landsliðnum eru umleið 80 føroyskir áskoðarar í Vilnius. Millum hesar eru formenninir í fótbóltsfeløgunum, sum á hvørjum ári plaga at vera við á ársins síðstu landsliðsferð.
Tað hevur regnað í Vilnius í dag, men nú er turt, og sólin kagar undan. Í kvøld vera 11 hitastig, tað verður turt, og vindurin verður umleið fimm metrar um sekundið.
