Gullbrandur í Horni Øregaard var á vøllinum allan dystin, og Olaf Bárðarson var á vøllinum í 72 minuttir, tá lið teirra, Sandnes ULF tók ímóti toppliðnum í næstbestu norsku fótbóltsdeildini, Haugesund á Øster Hus Arena leikvøllinum.
Olaf hevði tríggjar góðar royndir á málið hjá Haugesund, og Sandnes sum er fjórðaftast í deildini við 26 stigum vísti tenn í dystinum, ið endaði við javnleiki 1-1.
Eitt málmansmistak førdi til, at Haugesund legði seg á odda 1-0 longu í trettanda minutti. Í tíðini dómarin hevði lagt aftrat eydnaðist tað Ole Sebastian Sundgot aftaná gott upplegg frá Kevin Pereira at javna til 1-1.
Heimaáskoðararnir valdu Gullbrand at vera besta leikaran.
Mattias H. Lamhauge var á beinkinum í dag, tá Strømsgodset á útivølli vann 5-1 (3-0) á Lyn Oslo. Ein kelda hjá in.fo veit at siga, at Mattias fer aftur at verja málið komandi umførini.
Strømsgodset er triðfremst í deildini við 54 stigum. Fremst eru Kongsvinger og Haugesund við 56 stigum hvør.
