Seinnapartin í morgin klokkan 17 spælir føroyska A-landsliðið fyrsta dystin í hesari Nations League kappingini.
Í heimadysti í bólki 3 í deild C taka Føroyar á Tórsvølli móti Kasakstan.
KVF vísir dystin og FM1 sigur beinleiðis frá dystinum.
Føroyar hava á fimm sinnum møtt Kasakstan, og á trimum sinnum hava okkara vunnið. Vit hava bara ikki vunnið nakran kappingardyst á Kasakstan. Har hevur Kasakstan ein sigur og ein javnleik móti okkum.
Fyri meir enn 23 árum síðani, 27. apríl í 2003 spældu Føroyar venjingardyst móti Kasakstan á Svangaskarði. Føroyar vunnu dystin 3-2. Tá eitt korter var leikt av dystinum fingu Føroyar brotsspark, og Kasakstan fekk ein leikara vístan av vøllinum. Jákup á Borg setti brotssparkið í netið, og beint undan steðginum økti John Petersen til 2-0. Tíðliga í seinna hálvleiki skoraði Heðin á Lakjuni til 3-0. Men við bert 10 leikarum megnaði Kasakstan at skjóta tvey mál í seinna hálvleiki, so dysturin endaði við 3-2 sigri til Føroyar.
Tveir dagar seinni møttust liðini á Tórsvølli. Tá legði Kasakstan seg á odda longu í fimta minutti av dystinum. Í seinna hálvleiki syrgdu Andrew av Fløtum og Julian Johnsson tó fyri, at Føroyar vunnu dystin 2-1.
Fyrsti kappingardysturin móti Kasakstan - og higartil einasti dysturin á útivølli - var HM-undankappingardysturin á Astana Arena 6. september í 2013. Miðskeiðis í fyrra hálvleiki legði Fróði Benjaminsen Føroyar á odda aftaná eitt gott føroyskt álop. Tá vóru bert fimm minuttir leiktir av seinna hálvleiki, tá dómarin fann eitt brotsspark burtur úr ongum, og so kundi Kasakstan javna til 1-1. 14 minuttir seinni legði Kasakstan seg á odda, og teir hildu leiðsluna, og fyrsta - og higartil einasta - tapið fyri Kasakstan var veruleiki.
Fáar vikur seinni, 11. oktober í 2013 fingu Føroyar møguleikan at hevna tapið. Fýra minuttir undan steðginum legði Hallur Hansson Føroyar á odda við einum dreymahøggi úr 19-20 metrum. Kasakstan javnaði tó í 55. minutti, og 1-1 javnleikurin á heimavølli móti Kasakstan gjørdist einasta stigið okkara fingu í tí undankappingini.
Føroyar og Kasakstan spældu 18. november í fjør venjingardyst á uttanveltaðum vølli í Pula í Kroatia. Tá 25 minuttir vóru leiktir syrgdi Petur Knudsen í góðum samstarvi við Arnbjørn Svensson fyri føroyska sigursmálinum.
Í morgin er tað fyrsti kappingarsigurin á Kasakstan, ið okkara mugu fara eftir.
Kelda: FaroeSoccer
