Nógv verður gjørt burturúr, tá træseglskipini koma til Leirvíkar fríggjadagin hin 21. august, og eitt nú verður undirhald til øll á havnarlagnum.

- Komið til eina hugnaliga løtu við mati, aktivitetum og undirhaldi á havnarlagnum. Tiltakið er ókeypis, og vitjandi fáa bjóðað suppu og sneisabreyð.

Soleiðis siga tey á heimasíðuni hjá Eysturkommunu.

- Ókeyps atgongd verður eisini til dansin, har til ber at keypa sær okkurt leskandi, og øll eru hjartaliga vælkomin, verður lagt aftrat.

Í Eysturkommunu hava tey gjørt eina skrá fyri seglskipavitjanina, og her verður sagt, at skipini leggja til bryggju í Leirvík klokkan 17.

- Klokkan 17 fara skótarnir at skipa fyri undirhaldi fyri børnum, og millum klokkan 16 og 21 verður høvi at vitja Báta-og Listasavnið ókeypis.

Tá seglskipini eru komin, verur farið at grilla sneisabreyå, og suppa verður á Brandstøðini í Leirvík.

- Lávusarhús verður opið frá klokkan 18-22, og her verður høvi at keypa sær kaffi og ymiskt annað.

Borgarstjórin í Eysturkommunu, Per Martin Gregersen, fer at halda røðu klokkan 21, og síðan verður felagssangur á Brandstøðini.

- Klokkan 23 fríggjakvøldið verður dansur við LM Band á Brandstøðini, verður sagt á heimasíðuni hjá Eysturkommunu.