HB hevur í dag fingið boð um, at mini-undankappingin til Champions League, sum skuldi verða í Føroyum um tvær vikur, verður ikki spæld í Føroyum alíkavæl.

Orsøkin er, at evropesiska fótbóltssambandið metir at koronareglugerðirnar við sóttarhaldi í Føroyum eru ov strangar. Millum annað, tað at um ein spælari verður smittaður, so skal ein heilur hópur í sóttarhald. Hetta verður mett at verða ov sárbært fyri kappingina.

UEFA leitar nú eftir nýggjari vertstjóð til fýra-liðkappingina, sum telur meistaraliðini úr Føroyum, Kosovo, Andorra og San Marino. Hetta er ein dyggur smeitur fyri HB, sum hevur sæð sær ein fyrimun við at hýsa kappingini, og harvið hava fyrimun við heimavøllinum.