Um 11-tíðina í gjár fekk løgreglan fráboðan um, at bakrúturin á einum bili var skaddur. Bilurin stóð í miðbýnum, tætt við eitt skeinkistað.

Løgreglan frættir fegin frá fólki, sum hava sæð okkurt, ið kann hava samband við herverkið.

Eisini fekk løgreglan beint áðrenn klokkan 12 í gjár fráboðan um illgruna um rúsdrekkakoyring í norðurøkinum. Løgreglan fekk fatur á føraranum, men illgrunin vísti seg at vera ógrundaður.

Um tvey-tíðina í nátt varð tó ein bilførari tikin fyri rúsdrekkakoyring. Viðkomandi varð skuldsettur, og blóðroynd varð tikin. Síðani varð førarin leyslatin aftur.

Løgreglan varð eisini boðsend til eitt skeinkistað um 22-tíðina í gjárkvøldið, har upptrekk var til ófrið uttanfyri. Tveir bólkar av fólki vóru farnir at kjakast, og løgreglan sendi teir hvør sín veg.

Harumframt fór ein alarmur í gongd í Sandoyartunlinum, so bummurin fór niður. Talan var um ein tekniskan feil, sum tunnilsfelagið kannar nærri, sigur vaktleiðarin á politistøðini í morgun.