Spurningurin um vit skulu fara undir samráðingar við Russland im ein nýggjan fiskivinnusáttmála fyri næsta ár, hevur verið eitt av teimum heilt torføru spurningunum í føroyskum politikki síðani álopið á Ukraina.

Núverandi samgonga vildi ikki taka støðu men skumpaði ábyrgdina yvir á samgonguna, sum tekur við eftir løgtingsvalið.

Men fleiri flokkar hava kortini havt eina greiða støðu. Tjóðveldi er ein flokkur, sum hevur hildið, at vit eiga ikki at fara undir samráðingar við Russland.  

Í farnu viku segði Høgni Hoydal, formaður í Tjóðveldi, við okkum, at moralskt er tað lætt at taka støðu og tann støðan er, at vit skulu ikki samstarva við eitt land, sum loypur á eitt annað land. Men hann legði afturat, at treytin er, at okkurt annað verður ístaðin, tí annars fer tað at fáa álvarsligar avleiðingar fyri ávís øki í landinum, fyrst og fremst Norðoyggjar.

Men í eini fráboðan í dag boðar Tjóðveldi frá sum støðan er nú, ber tað ikki til at sleppa fiskivinnusamstarvinum við Russland.

– Tjóðveldi tekur onga avgerð sum hóttir gerandisdagin hjá fólki, sigur Tjóðveldi í eini fráboðan í dag. 

– Við ongum fyrireikingum og ongum alternativum, ber ikki til at gera broytingar beint nú, uttan at tað gongur hart útyvir føroysk húsarhald, siga tey.

– Vinnulívsfólk, og sjófólk, sum hava Barentshavið sum livibreyð, skulu kunna føla seg trygg í, at livibreyðið eisini er har eftir jól, sigur Tjóðveldi.