Endamálið er at byggja eina træbrúgv uttan fyri sølutorgið í Vágsbotni, so at fólk kunnu keypa vestan fyri sølutorgið, so tey ikki hava ampa av ferðsluni, sum er hinumegin.

Tað hevur leingi verið ein trupulleiki hjá teimum, sum selja, at tað ikki ber til at koma til við bili. Men nú er so ætlanin at venda torginum vestureftir, og at fólk skulu kunna parkera fram við bryggjukantinum, har tríggir básar við tíðaravmarking 15 minuttir verða gjørdir, so eldri fólk og illa gongd fólk fáa møguleikan at steðga á eina løtu og keypa sær eitt kók av onkru,m.

Seinastu dagarnar hava fólk frá Articon grivið evju upp av botninum og fylt upp við gróti. Hetta er fyri at gera støðið undir bryggjuni, áðrenn eitt betongfundament verður stoypt og ein træbrúgv løgd omaná. Hon verður 2,5 metrar breið og 35 metrar long.

##med2##

Ferðslan verður framyvir eisini avmarkað út á bryggjuna, sum hon hevur verið um summarið seinastu árini. Pullartarnir, sum hava verið har seinastu árini, koma ikki í nýtslu aftur. Men ein bummur verður settur upp, sigur borgarstjórin.

Heðin Mortensen, borgarstjóri, segði við in.fo mánadagin, at arbeiðið í øllum førum skal verða liðugt, áðrenn drotningin kemur hálvan juli.