Eftir at íslendska løgreglan um middagsleitið fór við tyrlu út á grønlendska trolaran, Polar Nanoq, í sambandi við ungu gentuna, sum hvarv í Íslandi um vikuskiftið, verður nú upplýst, at tveir mans eru handtiknir. Talan er um tveir grønlendingar. Trolarin Polar Nanoq er á veg innaftur til Hafnafirðar eftir boðum frá løgregluni, og hann væntast inni seint í kvøld. Grímur Grímsson, kanningarleiðari hjá íslendsku løgregluni sigur sambært visir.is, at teir báðir menninir vórðu handtiknir umborð á Polar Nanoq. – Hildið verður, at teir hava upplýsingar um, hvussu Birna Brjánsdóttur er horvi, sigur Grímur Grímsson. Hann vil ikki vátta, um teir hava rættarstøðu sum mistonktir í málinum. Yvirmenninir á Polar Nanoq eru føroyingar.