Tað sigur Aksel V. Johannesen, landsstýrismaður í fíggjarmálum, í svari til Bjarna Hammer, løgtingsmann. Bjarni Hammer spurdi, nær ætlanin í samgonguskjalinum um at avskriva íløgur í lætt umsetiligar ognir verður sett í verk, og um hon kann gera tað lættari hjá Strandferðsluni at fíggja, keypa og byggja nýggjar ferjur.

Sambært svarinum er ov tíðliga at siga, hvørjar ognir kunnu verða avskrivaðar, og nær nýggja skipanin kann koma í gildi. Ætlanin er at leggja meira orku í arbeiðið frá 2027 og eini tvey til trý ár fram. Peningur er settur av til arbeiðið í uppskotinum til fíggjarlóg fyri 2027.

Brúkar Smyril sum dømi

Smyril kostaði góðar 300 milliónir krónur at byggja og fór í sigling í 2005. Eftir galdandi reglum vórðu løguútreiðslurnar skrásettar so hvørt, sum byggiarbeiðið varð gjørt. Tí vóru tær stórar í byggitíðini og nógv minni árini eftir.

Í svarinum vísir landsstýrismaðurin, hvussu roknskapurin hevði sæð út, um skipið varð avskrivað yvir 25 ár og umvælingarnar yvir 15 ár. Tá hevði ein partur av kostnaðinum verið skrásettur hvørt ár, meðan skipið varð brúkt. Saman við útreiðslum til lønir, olju og viðlíkahald hevði tað givið eina greiðari mynd av, hvat tað kostar at veita tænastuna.

Landið skal framvegis rinda somu upphædd

Avskrivingar kunnu gera tað lættari hjá fíggjarlógini at rúma stórum íløgum, sigur landsstýrismaðurin. Landið skal framvegis rinda somu upphædd fyri nýggjar íløgur, og við einari nýggjari skipan skulu verandi ognir eisini avskrivast. Tí gevur broytingin sambært honum lítla rúmd fyri fleiri íløgum.

Landsstýrismaðurin sigur, at íløgurnar framvegis mugu stýrast við einari løguætlan. Sambært samgonguskjalinum skal ein løguætlan gerast fyri tíggju ár.