Løgtingið verður biðið um at heita á landsstýrið um at taka málið upp við íslendsku stjórnina.
Endamálið er, at føroyskt framleiddar vørur skulu fáa somu fríu atgongd til íslendska marknaðin, sum íslendskar vørur hava til føroyska marknaðin, og at leggja eina frágreiðing um málið fyri Løgtingið.
Tað stendur í uppskoti til samtyktar, sum Sámal Petur í Grund úr Sjálvstýri hevur lagt fram.
Í viðmerkingunum verður víst á Hoyvíkssáttmálan millum Føroyar og Ísland, sum varð undirskrivaður 31. august 2005. Endamálið við sáttmálanum er at skapa eitt felags búskaparpøki millum londini og beina burtur forðingar fyri handli, tænastum, kapitali og arbeiðsmegi. Sjálvur sáttmálin ásetur, at mismunur vegna tjóðskap, virkisstað ella vøruuppruna ikki skal gerast innan økið, sum sáttmálin fevnir um.
Sámal Petur í Grund heldur kortini, at hetta ikki er veruleikin í dag.
Í uppskotinum verður sagt, at meðan íslendskar vørur hava havt nærum óavmarkaða atgongd til føroyska marknaðin, hava føroyskir framleiðarar í stóran mun verið noyddir at fáa sínar vørur inn á íslendska marknaðin við serligum loyvum og umsóknum.
Hann vísir eisini á, at føroyskar fyritøkur í fleiri ár hava brúkt bæði tíð og pening upp á at loysa slíkar trupulleikar.
Spurningurin um føroyska atgongd til íslendska marknaðin er ikki nýggjur. Longu eftir at Hoyvíkssáttmálin kom í gildi vóru trupulleikar umrøddir, eitt nú við atgongd hjá føroyskum bryggjaríum til íslendska marknaðin. Í einum løgfrøðiligum notati frá 2006 varð víst á, at føroyskir framleiðarar máttu lúka serligar treytir fyri at sleppa inn í íslendsku einkarsøluna.
Eisini í 2011 varð málið tikið upp politiskt. Tá varð spurt, hvønn týdning Hoyvíkssáttmálin hevði havt fyri føroyskt vinnulív, og landsstýrið svaraði millum annað, at sáttmálin hevði givið føroyskum vørum og tænastum betri møguleikar á íslendska marknaðinum, men at ávísar forðingar framvegis høvdu verið.
Í nýggja uppskotinum verður sagt, at um ójavnvágin ikki verður rættað, eigur at verða kannað, um Hoyvíkssáttmálin skal broytast ella takast upp til nýggja viðgerð.
