Tað gekk skjótt fyri seg at bjarga manninum

Líkindini vóru ikki nakað serlig, men maðurin var væl fyri

Bjsrgingarbáturin, Royndin Fríða, uttan fyri hølini hjá Suðuroyar Norðara Bjargingarfelag

Tað gekk bæði skjótt og væl at bjarga manninum, sum kom í Havsneyð útfyri Sandvík. Tað var beint eftir midnátt, at fólk sóðu neyðrakettir og neyðbluss útfyri Sandvíksfles og samstundis varð boðað frá, at ein seksæringur, sum skuldi koma úr Havnini, var ikki framkomin.

 

MRCC sendi beinanvegin boð eftir Suðuroyar Norðara Bjargingarfelag og bjargingartyrluni. Claus Olsen, formaður í Suðuroyar Norðara Bjargingarfelag, sigur, at bjargingin gekk bæði skjótt og væl. Hann sigur, at tey fingu boðini klokkan 00.20 í gjárkvøldið og fóru alt fyri eitt at leita. Tað gekk væl at finna neyðstadda mannin, sum tá var farin í gummibátin, tí báturin var sokkin undan honum.

 

Claus Olsen sigur, at líkindini vóru ikki av teimum bestu, men tað var væl siglandi kortini, tó at tað ikki bar til at sigla so skjótt.

 

Teir vóru fyrstur hjá bátinum og longu klokkan 00.50, ella ein hálvan tíma eftir at teir høvdu fingið boðini, var maðurin bjargaður umborð á Royndina, sum bjargingarbáturin hjá teimum eitur.

 

Teir bjargaðu eisini nøkrum fiskakassum, sum lógu og flutu í sjónum, og so varð siglt inn við manninum. Eyðvitað var hann vátur, men annars var hann væl fyri.

 

Hann sigur, at báturin, sum var ein frambygdur seksæringur, var staddur ein hálvan fjórðing úr Flesini. Hann sigur, at tað var heppið, at maðurin hevði gummibát, tí annars er ivasamt, hvussu úrslitið hevði verið.

 

Tað er óvist, hví báturin sakk, men mett verður, at hann hevur siglt á okkurt, sum hevur ligið í sjónum.

 

Bjsrgingarbáturin, Royndin Fríða, uttan fyri hølini hjá Suðuroyar Norðara Bjargingarfelag