– Einaferð var eg vist yngsta forsætisráðfrúa í heiminum. Men nú eri eg vorðin aldursforseti millum stjórnarleiðararnar í Útnorðri, skrivar íslendska forsætisráðfrúan Kristrún Frostadóttir eftir fundin við Jens-Frederik Nielsen og Beinir Johannesen.
Og hon hevur í øllum førum rætt í tí, at hon er elst av teimum trimum.
Kristrún Frostadóttir er fødd 12. mai 1988 og er 38 ára gomul. Hon tók við sum forsætisráðfrúa í desember 2024 og gjørdist tá, 36 ára gomul, yngsta forsætisráðfrúa í søgu Íslands.
Grønlendski landsstýrisformaðurin Jens-Frederik Nielsen er føddur 22. juni 1991 og er 35 ára gamal. Hann hevur verið formaður í Naalakkersuisut síðan 2025.
Yngstur er føroyski løgmaðurin Beinir Johannesen. Hann er føddur 12. februar 1997 og er sostatt 29 ára gamal. Tá hann tók við sum løgmaður í apríl í ár, gjørdist hann yngsti løgmaður í føroyskari søgu.
Tað eru sostatt bara níggju ár millum tann elsta og tann yngsta av teimum trimum stjórnarleiðarunum.
Kristrún legði eisini dent á føroyska heitið á økinum í sínari dagføring.
– Ella „í Útnorðri“, sum føroyingar siga, skrivaði hon.
Hon nevndi fundin ein frálíkan dag saman við teimum báðum starvsfeløgunum úr Grønlandi og Føroyum og skrivaði, at tað altíð er stuttligt at fáa góðar vinir á vitjan.
Fundurin í Íslandi mikudagin var søguligur á tann hátt, at hetta var fyrstu ferð, at stjórnarleiðararnir í Føroyum, Grønlandi og Íslandi hittust serliga í einum av londunum fyri at umrøða felags áhugamál. Á skránni vóru millum annað trygd í Norðuratlantshavi og Arktis, búskapur, handil og samstarv millum tey trý londini.
Teir tríggir leiðararnir vitjaðu eisini trygdarøkið á Keflavíkarflugvølli og hittu altjóða íleggjarar, sum hava áhuga fyri møguleikum í Útnorðri og Arktis.
