Norðurlandahúsið skrivar at skráin fyri Bókadagar 2026 kunngjørd. Tað verða tveir dagar við bókmentum, samrøðum, upplestrum og ítrivum fyri bæði stór og smá, tá ið festivalurin savnar føroyskar og norðurlendskar rithøvundar, forløg, bókmentamiðlarar og lesarar.
Leygardagurin er fyrst og fremst fyri vaksin við einari skrá, sum varpar ljós á týdningin av bókmentum og korini hjá føroyska málinum. Til eitt orðaskifti um skíggjar og mál møtast fýra skarpar røddir fyri at kjakast um, hvussu talgildingin ávirkar málførleikar hjá børnum og ungum, og hvat vit kunnu gera fyri at styrkja lesihugin. Eitt annað pallborðsorðaskifti tekur upp grundleggjandi spurningin: Hví skulu vit lesa – meira? Her verður týdningurin av bókmentum fyri bæði menniskju og samfelag umrøddur.
Eisini verður sjóneykan sett á bókmentaummæli, tá ið Paula Gaard og danski ummælarin Lars Bukdahl fara at hava samrøðu um, hvat tað vil siga at ummæla bókmentir í Norðurlondum – og ikki minst í Føroyum.
Festivalurin fær vitjan av fleiri stórum, norðurlendskum rithøvundum. Danska Inger Smærup Sørensen fer at tosa um sína væl umtóktu skaldsøgu fru s við Lars Bukdahl, og íslendski rithøvundurin Hallgrímur Helgason fer at greiða frá sínum rithøvundavirksemi, harímillum skaldsøguni Tres kilo solskin. Eisini verður møguligt at hitta føroyska fjøllistamannin Heiðrik á Heygum, sum hevur givið gomlum, føroyskum søgnum nýtt lív við einari nútíðarligari, málsligari tillaging og egnum myndprýðingum.
Sunnudagurin er í størri mun ætlaður børnum og familjum. Her verður millum annað Handbók fyri superhetjur á skrá, og spennandi søgur verða vaktar til lívs við søguleikhúsi.
Henda dagin verður Ebbu-virðislønin 2026 eisini latin. Virðislønin, sum er á 25.000 krónur, verður á hvørjum ári handað einum ungum rithøvundi við serligum gávum og lovandi, bókmentaligum evnum og er við til at stuðla nýggjum røddum í føroyskum bókmentum.
Áðrenn Bókadagar veruliga fara í gongd, verður hitað upp við yrkingum í Blábar hóskvøldið og Ritsalon í Gallarí Havnará fríggjakvøldið.
Sí alla skránna her: https://www.nlh.fo/fo/tiltoek/bokadagar-2026
