Tað varð avgjørt á fyrsta serstaka leiðarafundinum millum londini, sum varð hildin í Íslandi í gjár.

Á fundinum vóru Beinir Johannesen, løgmaður, Jens-Frederik Nielsen, formaður í grønlendska landsstýrinum, og íslendska forsætisráðfrúan Kristrún Frostadóttir.

Sambært íslendska forsætismálaráðnum var hetta fyrstu ferð, at stjórnarleiðararnir í Føroyum, Grønlandi og Íslandi hittust í einum av londunum til ein fund, sum serliga var ætlaður felags áhugamálum hjá teimum trimum londunum.

Kristrún skemtar: – Nú eri eg tann elsta í Útnorðri

Nú verður ætlanin, at slíkir fundir skulu haldast á hvørjum ári.

Á tíðindafundinum eftir fundin segði Kristrún Frostadóttir, at londini hava nógv felags áhugamál og avbjóðingar, og at størri samstarv kann styrkja støðuna hjá teimum í einum heimi, har áhugin fyri Arktis og Norðuratlantshavi er vaksin nógv.

Beinir Johannesen legði dent á, at tað ov ofta eru onnur enn tey, sum sjálvi búgva í Arktis, sum seta orð á menningina í økinum. Tí er tað týdningarmikið, at londini sjálvi styrkja samstarvið og gera sína rødd galdandi.

Jens-Frederik Nielsen vísti eisini á, at samstarvið nú verður lyft upp á stjórnarleiðarastig. Útnorðurráðið hevur leingi verið parlamentariski samstarvspallurin millum Føroyar, Grønland og Ísland, men við árligu leiðarafundunum fáa stjórnirnar nú eisini ein fastan politiskan pall.

Á fundinum varð millum annað tosað um trygdina í Norðuratlantshavi og Arktis, vinnuligar møguleikar og altjóða íløgur.

Leiðararnir vitjaðu eisini trygdarøkið á Keflavíkarflugvølli og hittu altjóða íleggjarar, sum hava áhuga fyri møguleikum í Útnorðri og Arktis.

Kelda: Forsætismálaráðið í Íslandi/Sermitsiaq